Keir Starmer anuncia ona katak nia sei husik kargu nu’udar Primeiru-Ministru hafoin loron balu hetan presáun boot husi deputadu sira husi Partidu Trabalhista (Labour). Decizaun ida-ne’e loke dalan ba Andy Burnham atu simu lideransa no okupa Downing Street.
Menus husi tinan rua hafoin manán eleisaun ho rezultadu istóriku, Starmer hasoru ona pedidu husi deputadu sira, inklui membru gabinete balun, atu hatudu kalendáriu ba nia saída husi lideransa. Barak preokupa ho ameasa polítika husi partidu Nigel Farage nian antes eleisaun jerál tuir mai.
Desizaun Starmer atu anuncia nia saída hahú prosesu atu hili Primeiru-Ministru foun ba Reino Unido, ne’ebé sei sai Primeiru-Ministru da-hitu iha tinan 10 nia laran.
Andy Burnham confirma ona katak nia sei konkorre ba lideransa Partidu Labour. Nia dehan katak tranzisaun poder ne’ebé ordenadu no responsavel sei garante estabilidade, seriedade no foku kontinua ba problema sira ne’ebé importante liu ba nasaun.
Minutu balu de’it hafoin deklarasaun Burnham, Wes Streeting, polítiku ida ne’ebé konsidera hanesan konkorente forte, anuncia katak nia suporta Burnham. Ida-ne’e halo Burnham nia vitoria sai provavel tebes.
Burnham, ne’ebé halo viajen husi Manchester ba Westminster iha segunda-feira, bele iha semana tolu resin de’it atu prepara ba governu, inklui determina prioridade polítika no hili nia gabinete. Nia desizaun atu hili Ministru Finansas (Chancellor) foun mos hein hela ho atensaun boot.
Tuir kalendáriu ida-ne’e, Burnham bele okupa kargu molok Enkontru Estratéjiku entre Reino Unido no Uniaun Europeia iha loron 22 Jullu. Desizaun polítika importante balun, hanesan planu investimentu defeza, bele adia to’o nia asume ofisiálmente kargu refere.
Ko’alia iha edifísiu Númeru 10 Downing Street nia oin, Starmer dehan:
“Pergunta ne’ebé hau nia partidu husu agora mak se hau sei ema ne’ebé di’ak liu atu lori ami ba eleisaun jerál tuir mai. Hau rona ona resposta husi hau nia grupu parlamentar no hau simu resposta ne’e ho respeitu. Desizaun hotu ne’ebé hau foti sempre hodi tau nasaun ida-ne’ebé hau hadomi iha primeiru. Tanba ne’e mak hau sei rezigna nu’udar lider Labour Party.”
Maske iha sexta-feira, nia afirma katak nia sei luta ba kompetisaun lideransa, mas hafoin konversa ho ministru sira no tempu balun halo diskusaun ho nia feen, Victoria, durante fim-de-semana, muda nia hanoin.
Relatóriu sira hatudu katak ministru gabinete barak dehan ba nia iha privadu katak tempu atu sai ona. Nia ekipa ne'ebe besik nia hahú prepara diskursu rezignasaun dezde sábadu.
Starmer dehan nia sei husu Komité Ezekutivu Nasionál Labour Party atu estabelese kalendáriu ba eleisaun lideransa, ho kandidatura hahú iha 9 Jullu no remata antes férias parlamentár.
Nia sei kontinua nu’udar Primeiru-Ministru to’o Parlamentu fila iha Setembru. Maibé se la iha disputa lideransa, Burnham bele simu kargu iha 16 ka 17 Jullu.
Starmer promete katak nia sei halo buat hotu atu garante tranzisaun poder ne’ebé ordenadu no di’ak. Nia mos afirma katak sei fó apoiu tomak ba nia substitutu.
“Hau sei fó apoiu tomak no klaru ba hau nia susesór, tanba hau hatene katak nia sei simu Reino Unido ida ne’ebé forte liu no justu liu kompara ho kondisaun ne’ebé hau simu tinan rua liubá.”
Burnham agradese Starmer ba servisu boot ne’ebé nia halo ba nasaun durante períodu difísil ida. Nia dehan katak prosesu tranzisaun ida-ne’e tenke hala’o ho orden no responsabilidade.
Lider foun ne’ebé sei substitui Starmer sei enfrenta dezafiu boot sira, inklui ekonomia Reino Unido, situasaun internasionál ne’ebé frájil, no kompetisaun polítika hasoru Reform UK.
Deputadu Labour Party balun preokupa katak Burnham seidauk prepara di’ak ba kargu ida-ne’e, maibé seluk sira fiar katak tranzisaun lalais mak di’ak liu atu evita estragus tan imajen partidu nian.
Iha nia diskursu despedida, Starmer emosional tebes bainhira ko’alia kona-ba nia kolega sira no nia família.
“Bainhira hau husik servisu boot liu iha nasaun ida-ne’e, hau sei fó tempu barak liu ba servisu importante liu, mak sai laen ne'ebe di’ak liu ba hau nia feen extraordinária, Vic, no sai aman di’ak liu ba hau nia oan sira ne’ebé mak hau nia orgullu no kontente boot.”
Saída Starmer nian remata períodu presáun polítika naruk ida. Maski nia sai lider Trabalhista da-hitu ne’ebé konsege manán eleisaun, no iha 2024 hetan asesu parlamentár barak liu desde tempu Tony Blair iha 1997, nia lideransa sofre kritika kontinua tanba desizaun polítika kontroversiál no rezultadu eleitórál ne’ebé la satisfatóriu.
Nune’e, Keir Starmer nia rezignasaun marka mudansa importante ida iha polítika Reino Unido, ho Andy Burnham agora sai figura ne’ebé provavel tebes atu lidera governu no Labour Party ba futuru.
