DÍLI, 3 Jullu 2026 (GMT News) – PPrezidente Repúblika, José Ramos-Horta, hato'o nia profunda tristeza no pesar ba falesimentu Reverendíssimu Padre João de Vasconcelos Baptista Felgueiras, jezuita ne'ebé dedika kuaze nia moris tomak ba servisu ba povu Timor-Leste. Padre João hakotu iis ohin iha Díli ho idade tinan 105.
Iha deklarasaun ofisiál ne'ebé GMT News asesu iha pájina facebook Jose Ramos-Horta, Prezidente Ramos-Horta hateten katak Timor-Leste lakon ona figura esepsionál ida iha istória kontemporánea nasaun, ne'ebé nia moris tomak dedika ba servisu ba ema seluk, edukasaun, dignidade umana no konstrusaun identidade nasionál.
Padre João Felgueiras to'o Timor-Leste iha tinan 1971 hanesan misionáriu Companhia de Jesus no hela iha nasaun ida-ne'e liu hosi tinan 50. Durante tempu okupasaun indonézia, bainhira lian portugés hetan proibisaun no identidade kulturál povu timoroan hetan ameasa, Padre João hili atu nafatin hela hamutuk ho povu Timor-Leste, fahe sofrimentu, esperansa no luta ba liberdade.
Nu'udar edukadór ida ne'ebé la hatene kolen, Padre João dedika nia moris ba formasaun juventude, promosaun lian portugés no harii instituisaun edukativa sira. Ida hosi nia legadu boot liu mak Escola Amigos de Jesus, ne'ebé sai símbolu ba nia kompromisu atu uza edukasaun hanesan instrumentu ba liberdade no transformasaun sosial.
Prezidente Ramos-Horta mós destaca katak kontribuisaun Padre João hetan rekonesimentu hosi Estadu Timor-Leste no komunidade internasionál, liuhosi kondekorasaun oioin, inklui Insígnia Ordem Timor-Leste no Grã-Cruz da Ordem de Camões.
Iha parte pessoal, Prezidente dehan Padre João la'ós de'it misionáriu ka edukadór, maibé mós belun kleur ida, konselleiru ne'ebé hakmatek no inspirasaun ba nia. Nia lembra vizita sira ne'ebé halo ba Padre João iha Díli, no destaca katak to'o ba idade avançada, Padre João kontinua hatudu klaridade hanoin, alegria no fiar metin, sempre servisu ba povu Timor-Leste.
Prezidente Ramos-Horta hateten katak iha okaziaun públika barak nia temi Padre João hanesan "Profeta ba Edukasaun no Solidariedade", tanba durante períodu difísil sira iha istória Timor-Leste, nia la husik povu timoroan no kontinua fiar ba futuru nasaun.
Nia subliña katak legadu Padre João sei moris nafatin la'ós de'it iha instituisaun sira ne'ebé nia ajuda harii, maibé liuliu iha jerasaun timoroan sira ne'ebé nia forma, inspira no akompaña ho dedikasaun durante liu hosi lima dekada.
Iha remate nia mensajen, Prezidente Repúblika hato'o condolénsia ba Companhia de Jesus, família Padre João iha Portugal, komunidade edukativa sira ne'ebé nia funda no ema hotu ne'ebé konhese no servisu hamutuk ho nia.
"Descansa iha dame, querido Padre João Felgueiras. Povu Timor-Leste sei la haluha ita-nia naran no ita-nia legadu," hakerek Prezidente José Ramos-Horta iha nia deklarasaun ofisiál.
