DÍLI, 3 Jullu 2026 – Embaixadór Portugal iha Timor-Leste, Duarte Bué Alves, hato'o mensajen profunda pesar ba falesimentu Padre João Felgueiras, Jezuita portugéz ne'ebé dedika dekada lima resin ba povu Timor-Leste.
Iha mensajen ne'ebé publika iha pájina Facebook ofisiál Embaixada de Portugal em Díli, embaixadór hateten katak Padre João Felgueiras dedika nia moris ne'ebé liu sékulu ida resin ba Maromak, Igreja Katólika, Companhia de Jesus no mós ba Timor-Leste.
“Uma vida de mais de um século dedicada a Deus, à Igreja, aos Jesuítas e também a Timor-Leste,” hakerek Embaixadór Duarte Bué Alves.
Embaixadór Portugal mós fahe nia esperiénsia pesoál ho Padre João. Nia dehan vizita dahuluk ba misionáriu jezuita ne'e akontese iha 3 Outubru 2025, loron balun de'it hafoin nia to'o Díli atu hahú nia misaun diplomátika.
“Conversámos e lanchámos e guardo a memória do seu sorriso,” dehan nia.
Duarte Bué Alves hateten katak nia hakru'uk ho respeitu boot ba ezemplu moris Padre João Felgueiras, ne'ebé durante tinan barak servisu hanesan misionáriu, edukadór no promotor lian portugéz iha Timor-Leste.
Nia mós salienta katak komunidade portugéz no povu timoroan lakon ona figura importante ida.
“A comunidade portuguesa e todos os timorenses perderam um referencial. Que descanse em paz,” hakerek embaixadór.
Padre João Felgueiras hakotu iis iha Díli iha loron 3 Jullu 2026, ho idade 105 tinan, hafoin dedika nia moris ba edukasaun, promosaun lian portugéz no dezenvolvimentu juventude timoroan. Nia hela iha Timor-Leste dezde 1971 no durante okupasaun indonézia kontinua apoia povu timoroan no preserva lian portugéz, ne'ebé iha tempu ne'ebá hetan proibisaun. Nia mós funda Escola Amigos de Jesus, legadu ida hosi nia legadu boot sira ba edukasaun iha Timor-Leste.
