Díli, 3 Jullu 2026 – Prezidente Repúblika, José Ramos-Horta, ohin kondekora Primeiru-Ministru no Ministru Finansas Repúblika Singapura, Lawrence Wong, ho Grande Colar Ordem Timor-Leste, kondekorasaun aas liu hosi Estadu Timor-Leste, iha serimónia ofisiál iha Palásiu Prezidensiál, Díli. Kondekorasaun ne'e rekoñese kontribuisaun boot Singapura nian ba dezenvolvimentu Timor-Leste no apoiu ne'ebé kontinua ba prosesu adezaun Timor-Leste ba ASEAN.
Prezidente Ramos-Horta hateten katak kondekorasaun ne'e reprezenta agradesimentu hosi povu no Estadu Timor-Leste ba Primeiru-Ministru Lawrence Wong no povu Singapura tanba amizade metin, solidariedade no kooperasaun ne'ebé dura durante tinan barak. Singapura konsidera nu'udar parseiru estratéjiku ida ba Timor-Leste, liuliu iha área dezenvolvimentu rekursu umanu, fortalesimentu instituisaun públika no dezenvolvimentu ekonomia.
Iha nia diskursu, Primeiru-Ministru Lawrence Wong dehan katak kondekorasaun ne'e la'ós de'it ba nia rasik, maibé ba Estadu no povu Singapura ne'ebé hamutuk kontribui atu hametin amizade no kooperasaun ho Timor-Leste. Nia mós elojia korajen no reziliénsia povu Timor-Leste, no afirma katak futuru nasaun ida depende ba povu nia determinasaun no lideransa, la'ós de'it ba rekursu naturál.
Serimónia ne'e realiza durante vizita ofisiál dahuluk hosi Primeiru-Ministru Singapura ba Timor-Leste, ne'ebé marka etapa istórika ida iha relasaun diplomátika entre nasaun rua. Durante vizita ne'e, lider sira mós hala'o enkontru bilateral, asina akordu kooperasaun no reafirma kompromisu atu haburas relasaun bilateral no servisu hamutuk iha kuadru ASEAN.
Primeiru-Ministru Kay Rala Xanana Gusmão, membru Governu, membru Parlamentu Nasionál no alta autoridade Estadu sira marka prezensa iha serimónia ne'e, ne'ebé konsidera hanesan momentu importante ida atu hametin amizade no kooperasaun entre Timor-Leste no Singapura.
