DÍLI, 3 Jullu 2026 - Guerra entre Rusia no Ukraina kontinua sai intensu liu. Iha kalan 2 Jullu 2026, Rusia lansa atake aéreu boot ida ba kapital Ukraina, Kyiv, uza drone no míssil iha operasaun ne'ebé konsidera hanesan ida husi atake boot liu ba sidade ne'e iha tinan ida ne'e.
Segundo Forsa Aérea Ukraina, Rusia lansa 496 drone no 74 míssil ba alvu oioin iha Kyiv no rejiaun seluk. Sistema defeza aérea Ukraina konsege haruka monu maioria husi drone no míssil sira, maibé balun nafatin konsege atinji alvu.
Autoridade Ukraina konfirma katak pelo menus ema nain 17 mate no liu husi 90 kanek. Ekipa bombeiru, saúde no salvamentu kontinua buka sobrevivente sira iha edifísiu rezidensiál ne'ebé monu no fatin sira ne'ebé hetan estragus.
Atake ne'e mós estraga edifísiu rezidensiál, hotel, no infraestrutura importante iha kapital. Prezidente Ukraina, Volodymyr Zelenskyy, kondena atake ne'e no dehan katak Ukraina presiza kontinua hetan apoiu husi parseiru internasionál, liuliu sistema defeza aérea atu proteje populasaun sivil no infraestrutura estratéjika.
Iha sorin seluk, Kremlin dehan katak operasaun militar ne'e fó alvu ba fatin ne'ebé liga ho atividade militar no indústria defesa Ukraina. Porta-voz Kremlin, Dmitry Peskov, dehan katak Rusia sei kontinua aumenta presáun militar atu atinji nia objetivu iha konflitu ne'e.
Analista militar sira haree katak atake ne'e mosu depois de Ukraina aumenta operasaun drone ba refinaria mina no infraestrutura enerjia iha laran teritoriu Rusia. Durante fulan hirak ikus, Kyiv kontinua uza drone atu ataka depósitu combustível, refinaria no sentru lojístika ne'ebé konsidera importante ba operasaun militar Rusia.
To'o agora, la iha sinál katak parte rua ne'e hakarak hamenus operasaun militar. Pelo kontráriu, konflitu ne'e kontinua tama ba etapa ida ne'ebé drone, míssil no atake ba infraestrutura estratéjika sai arma prinsipal.
Komunidade internasionál kontinua apela ba diálogu no esforsu diplomátiku, maibé iha terrenu, kombate no atake aérea sei kontinua aumenta.
