DÍLI, 3 Jullu 2026 – Padre jezuita João Felgueiras, ne'ebé hakotu nia jornada moris ohin ho idade tinan 105, la'ós de'it rekoñesidu iha Timor-Leste tanba nia servisu pastorál no edukasaun, maibé mós simu ona kondekorasaun importante hosi Estadu Portugal tanba nia kontribuisaun ba povu timoroan.
Iha tinan 2002, Prezidente Portugal iha tempu ne'ebá, Jorge Sampaio, kondekora Padre João Felgueiras ho grau Grande Oficial da Ordem da Liberdade, hanesan rekonesimentu ba nia kompromisu iha luta ba dignidade povu Timor-Leste no ba kauza timoroan. Kondekorasaun ne'e mós rekoñese nia esforsu atu preserva no promove lian portugés durante períodu okupasaun indonézia, bainhira lian ne'e hetan restrisaun iha Timor-Leste.
Padre João Felgueiras hela no servisu iha Timor-Leste desde tinan 1971, dedikadu liu hosi metade hosi nia moris ba edukasaun, formasaun juventude no dezenvolvimentu komunidade timoroan. Durante tempu konflitu no okupasaun, nia nafatin hela iha Timor-Leste no akompaña povu timoroan iha tempu difísil sira.
Depois de kondekorasaun hosi Jorge Sampaio, Padre João Felgueiras simu tan ona kondekorasaun hosi Estadu Timor-Leste no Portugal. Iha 2016, nia simu Insígnia Ordem Timor-Leste, no iha 2022 hetan Colar Ordem Timor-Leste hosi Prezidente Francisco Guterres "Lú-Olo", no Grã-Cruz da Ordem de Camões hosi Prezidente Portugal Marcelo Rebelo de Sousa, tanba nia kontribuisaun ba promosaun lian no kultura portugés no dezenvolvimentu Timor-Leste.
