DÍLI, 1 Jullu 2026 – Kustu viajen servisu membru Governu ba rai liur kontinua sai tema debate iha públiku, ho Partidu Libertasaun Popular (PLP) no akademista ida husi Universidade Nacional Timor Lorosa'e (UNTL) husu transparénsia no fiskalizasaun rigorozu ba uza osan públiku.
Vice-Presidente Partidu Libertasaun Popular (PLP) ba Asuntu Orgaun Asosiadu no Movimentu, Amílcar dos Reis Araújo "Hatenu", hato'o preokupasaun ne'e iha entrevista ho STL iha ninia rezidénsia iha Manleuana, Díli, Kuarta (1/7).
Tuir Amílcar, viajen servisu balu membru Governu nian iha rai liur dura to'o semana rua resin no envolve gastu estadu ne'ebé konsidera aas. Tanba ne'e, nia husu Parlamentu Nasionál atu hala'o fiskalizasaun rigorozu hodi asegura katak gastu hirak ne'e fó benefísiu konkretu ba povu no dezenvolvimentu nasaun.
"Publiku presiza hatene osan ne'ebé fakar sai lori fali benefísiu loloos ba povu ka lae. Parlamentu Nasionál labele nonok, tenke fiskaliza no husu relatóriu kompletu kona-ba gastu hotu-hotu ba viajen hirak ne'e," dehan Amílcar.
Politiku PLP ne'e mos dehan katak, iha situasaun ne'ebé rai sei enfrenta dezafiu iha infraestrutura, bee moos, saúde, edukasaun no servisu báziku seluk, Governu presiza fó justifikasaun klaru ba gastu viajen servisu ne'ebé boot.
Nia akresenta katak transparénsia no responsabilidade iha jestaun osan públiku importante atu aumenta konfiansa públiku ba instituisaun estadu.
Iha parte seluk, akademista husi Universidade Nacional Timor Lorosa'e (UNTL), José Soares, mos hato'o preokupasaun hanesan.
Tuir José, Governu presiza halo avaliasaun kle'an ba viajen servisu sira atu garante katak uza osan estadu bazeia duni ba nesesidade urjente no lori rezultadu ne'ebé bele sente diretamente husi komunidade.
"Osan Estadu ne'ebé boot ba viajen rai liur bele uza mos ba sosa medikamentu iha ospitál sira, hadi'a eskola ne'ebé aat no responde ba nesesidade urjente sira seluk," hatete José Soares.
Akademista ne'e dehan katak efisiénsia iha uza osan públiku tenke sai prioridade, liuliu iha tempu ne'ebé Governu enfrenta limitasaun fiskál no povu kontinua presiza servisu públiku ne'ebé di'ak liu.
To'o notísia ida-ne'e prepara ba publikasaun, parte Governu seidauk fó resposta ka klarifikasaun ofisiál kona-ba kritika no preokupasaun hirak ne'ebé hato'o husi PLP no akademista UNTL.
