Díli, 1 Jullu 2026 (GMT News) – Prezidente Namíbia, Netumbo Nandi-Ndaitwah, reafirma katak korupsaun la'ós de'it violasaun administrativu, maibé tenke konsidera hanesan traisaun hasoru Estadu tanba estraga dezenvolvimentu nasaun no viola konfiansa povu nian.

Iha nia deklarasaun, Prezidente Nandi-Ndaitwah hateten katak korupsaun sai ameasa boot ba independénsia ekonomia no soberania nasaun. Nia konsidera katak ofisiál públiku sira ne'ebé uza kargu atu hetan benefísiu pesoál, liuhusi koluzaun ho interese estranjeiru ka grupu partikular, halo prejuízu boot ba povu no dezenvolvimentu nasaun.

Prezidente Namíbia ne'ebé uluk partisipa iha luta libertasaun husi movimentu SWAPO, reafirma nia governu sei adota medida rigorozu hasoru korupsaun. Nia dehan laiha ema ida mak aas liu lei, no ema hotu, inklui ministru, kontratadór no funsionáriu públiku sira, sei responsabiliza bainhira envolve iha pratika korupta.

Nia mos husu sidadaun Namíbia hotu atu hamutuk kombate korupsaun, tanba fenomena ida-ne'e prejudika servisu públiku, limita oportunidade ba juventude, no impede nasaun atu benefisia husi nia rekursu naturais sira.

Deklarasaun ida-ne'e mos lori mensajen ba nasaun Afrikanu sira atu haforsa instituisaun anti-korupsaun, garante transparénsia iha jestaun rekursu naturais, no promove dezenvolvimentu ne'ebé fó benefísiu ba povu tomak. Tuir Prezidente Nandi-Ndaitwah, rekursu Afrikanu tenke uza ba prosperidade povu, la'ós ba interese ema balun de'it.

Mensajen ne'e hetan atensaun boot iha sosiedade no observadór polítika sira, ne'ebé haree deklarasaun ida-ne'e hanesan sinal forte katak governu Namíbia hakarak haforsa boa governasaun no kombate korupsaun ho kompromisu aas.