Kazan, Rússia – Prezidenti Federação Rússia, Vladimir Putin, no Primeiru-Ministru Timor-Leste, Kay Rala Xanana Gusmão, hala’o enkontru bilaterál istóriku ida iha marjen ASEAN–Russia Commemorative Summit iha Kazan, Rússia. Enkontru ne’e marka vizita ofisiál dahuluk Xanana Gusmão ba Rússia no partisipasaun dahuluk Timor-Leste nian nu’udar membru tomak ASEAN iha ASEAN–Russia Summit.

Durante reuniaun ne’e, líder rua ne’e diskute oinsá atu haburas no aprofunda relasaun diplomátika entre nasaun rua ne’e, hodi prepara komemorasaun aniversáriu dala-25 relasaun diplomátika entre Rússia no Timor-Leste iha tinan 2027. Tópiku sira ne’ebé sai atensaun prinsipál inklui edukasaun, treinamentu profisionál, kooperasaun umanitáriu no parseria bilaterál iha futuru.

Prezidenti Putin reafirma interese Rússia nian atu aumenta númeru bolsa estudu ba estudante timoroan sira no promove oportunidade treinamentu ba profisionál timoroan iha área estratéjika oioin. Nia mos hatudu interese atu haburas koperasaun iha setór enerjia, rekursu naturál no dezenvolvimentu rekursu umanu.

Iha nia intervensaun, Primeiru-Ministru Xanana Gusmão lembra apoiu istóriku ne’ebé União Soviética fó ba povu Timor-Leste durante luta ba independénsia. Nia subliña katak amizade no solidariedade ne’ebé harii durante tempu luta tenke sai baze forte ida ba koperasaun entre nasaun rua ne’e iha futuru.

Prezidenti Putin mos rekoñese papél importante Xanana Gusmão nian iha movimentu libertasaun nasional no prosesu konstrusaun Estadu Timor-Leste. Nia hateten katak lideransa Xanana kontribui signifikativamente ba alkansa dame, estabilidade no dezenvolvimentu iha nasaun foun ne’e.

Aleinde ne’e, parte rua ne’e diskute oportunidade atu estabelese embaixada permanente iha Moskova no Díli, hodi fasilita komunikasaun diplomátika no promove komérsiu, investimentu no troka esperiénsia entre instituisaun sira.

Observadór sira konsidera enkontru ne’e nu’udar etapa importante ida ba relasaun bilateral entre Rússia no Timor-Leste, ne’ebé hatudu vontade mútua atu fortalese koperasaun iha área edukasaun, diplomasia, dezenvolvimentu ekonómiku no envolvimentu rejionál liuhosi ASEAN.

Enkontru ne’e mos reafirma kompromisu líder rua ne’e atu kontinua servisu hamutuk hodi haburas amizade no parseria estratéjika entre Federação Rússia no República Demokrátika Timor-Leste ba benefísiu povu nasaun rua ne’e.