Díli, Juñu 2026 (GMT News) – Prezidenti Iran, Masoud Pezeshkian, reafirma katak programa míseis balístiku Iran nian la negosiável no sei la tama iha kualkér negosiasaun ho nasaun seluk, liu-liu ho Estadus Unidus. Deklarasaun ne’e hato’o durante nia vizita ofisiál ba Pakistan, nasaun ne’ebé atualmente dezempeña papél importante hanesan mediadór iha diálogu entre Teeraun (Teheran) no Washington.
Tuir Pezeshkian, kapasidade defeza Iran nian, inklui nia míseis balístiku sira, importante tebes atu garante seguransa no soberania nasionál. Nia dehan katak se Iran la iha kapasidade defeza ne’e, país ne’e bele sofre destruisaun hanesan ne’ebé akontese iha Gaza durante konflitu sira iha rejiaun.
“Se laiha míseis balístiku sira ne’ebé ami iha ba defeza, Israel no Estadus Unidus sei trata Iran hanesan Gaza, la hatudu mizerikórdia/perdaun ba katuas ka labarik sira,” hateten Pezeshkian durante enkontru ida iha Islamabad.
Prezidenti Iran mos subliña katak Teerão(Teheran) la sei diskute ka negosia kona-ba nia kapasidade defeza iha situasaun saida deit.
“Ami la sei negosia ho ema ida, iha sirkunstánsia ruma kona-ba ami nia kapasidade defeza,” nia afirma.
Komentáriu sira ne’e mai iha tempu ne’ebé Iraun no Estadus Unidus kontinua halo esforsu diplomátiku atu atinji akordu permanente ida depois memorandu entendimentu (MoU) ne’ebé asina tiha ona entre parte rua. Autoridade Iran nian insiste katak programa míseis balístiku la tama iha akordu refere no sei la tama iha negosiasaun sira iha futuru.
Durante vizita ne’e, Primeiru-Ministru Pakistan, Shehbaz Sharif, mos confirma katak programa míseis Iran nian “nunka iha meza negosiasaun” durante koalia entre Iraun no Estadus Unidus. Nia dehan katak la bele iha padraun rua ne’ebé permite nasaun balu atu iha míseis balístiku, maibé nega direitu hanesan ba Iraun.
Deklarasaun Pezeshkian nian reflete pozisaun firme Teerão(Teheran) nian katak kapasidade militár no defeza nasionál sei kontinua sai liña mean ida iha kualkér negosiasaun diplomátika ho poténsia estranjeira sira.
GMT News
