Lisboa, Portugal, Juñu 2026 (GMT News) – Primeiru-Ministru Timor-Leste, Kay Rala Xanana Gusmão, reafirma kompromisu Timor-Leste atu hametin Komunidade Nasaun Sira Lian Portugés (CPLP), kooperasaun multilaterál no unidade entre Estadu-membru sira durante vizita ofisiál ba sede CPLP iha Lisboa, Portugál, segunda-feira (22/06).
Iha intervensaun ba Reprezentante Permanente sira hosi Estadu-membru CPLP no Sekretária Ezekutiva CPLP, Maria de Fátima Monteiro Jardim, Primeiru-Ministru destaka katak vizita ne’e iha signifikadu espesiál tanba CPLP selebra aniversáriu ba dala-30 hosi nia fundasaun.
“Selebrasaun ne’e sai oportunidade atu reafirma valor unidade iha diversidade no hametin lasu istóriku, kulturál no polítiku sira ne’ebé liga povu sira ne’ebé ko’alia lian portugés,” hateten Xanana Gusmão.
Primeiru-Ministru subliña katak situasaun internasionál atuál, ne’ebé marka ho incerteza no instabilidade, husu nasaun sira atu reforsa multilateralizmu, diálogu no kooperasaun hodi responde hamutuk ba dezafiu globál sira.
Durante enkontru ne’e, lider no reprezentante sira diskute kestaun estratéjika sira hanesan mobilidade entre Estadu-membru sira, aprofundamentu integrasaun ekonómika, kooperasaun setoriál no fortalese kolaborasaun iha área marítima no oseánika.
Xanana Gusmão mós destaca importánsia atu aproxima CPLP ba rejiaun estratéjika sira seluk, partikularmente ASEAN, hodi loke oportunidade foun ba kooperasaun no dezenvolvimentu entre nasaun membru sira.
“Timor-Leste assume Prezidénsia Pro Tempore CPLP ho sentidu responsabilidade no fiar ba prinsipiu sira organizasaun nian,” hateten Primeiru-Ministru.
Nia mós reafirma prontidaun Timor-Leste atu servisu hamutuk ho Estadu-membru no Observadór Asosiadu sira, no hato’o konvite ba membru CPLP hotu-hotu atu partisipa iha Reuniaun Konsellu Ministrus CPLP ne’ebé sei realiza iha Dili iha fulan Agostu 2026.
Sekretária Ezekutiva CPLP, Maria de Fátima Monteiro Jardim, elojia lideransa Timor-Leste durante nia ezersísiu nu’udar Prezidénsia Pro Tempore CPLP. Nia destaca kompromisu Timor-Leste atu promove unidade, mobilidade, kooperasaun ekonómika no dezenvolvimentu sustentável iha komunidade ne’e.
Maria de Fátima Jardim reafirma mós apoiu Sekretariadu Ezekutivu CPLP ba preparasaun Reuniaun Konsellu Ministrus CPLP iha Dili no manifesta konfiansa katak Timor-Leste sei kontinua fó kontribuisaun importante ba fortalesimentu CPLP iha nível internasionál.
Vizita ne’e realiza iha kontestu Timor-Leste nia lideransa atual iha CPLP no esforsu kontinuu atu hametin papél organizasaun ne’e iha promosaun solidariedade, kooperasaun no dezenvolvimentu sustentável entre nasaun membru sira.
Primeiru-Ministru Xanana Gusmão akompaña hosi Ministru Justisa Sérgio da Costa Hornai, Ministra Edukasaun Dulce de Jesus Soares, Embaixadora Timor-Leste ba CPLP Natália Carrascalão, Embaixadór Timor-Leste ba Portugál Manuel de Araújo Serrano, Xefe Gabinete Primeiru-Ministru Elizabeth Exposto no Inês Araújo Gonçalves.
