Díli, 29 Juñu 2026 (GMT News) – Timoroan Prof. Dr. Benjamim Corte-Real ofisialmente simu kargu nu’udar Prezidente ba Asembleia Jerál Instituto Internacional da Língua Portuguesa (IILP), kuarta-feira loron 24 Juñu, ho kompromisu atu hametin promosaun no dezenvolvimentu língua portugés iha nivel internasionál.
IILP, ne’ebé nia sede iha Cabo Verde, mak instituisaun espesializada ida husi Comunidade dos Países da Língua Portuguesa (CPLP) ne’ebé responsabiliza ba koordenasaun no promosaun língua portugés iha mundu tomak.
Iha nia diskursu inisiál, Prof. Dr. Benjamim Corte-Real reafirma katak Timor-Leste kontinua iha kompromisu forte atu promove língua portugés liuhusi koperasaun multilateral iha CPLP. Nia subliña katak servisu hamutuk entre Estadu-membru sira importante tebes atu reforsa papel IILP no hasa’e prestíjiu língua portugés iha arena internasionál.
Nomeasaun ida-ne’e marka etapa foun ba IILP, tanba Prof. Dr. Benjamim Corte-Real sai prezidente dahuluk ba Asembleia Jerál, órgaun governasaun foun ne’ebé kria liuhusi alterasaun Estatutu IILP atu fó orientasaun estratéjika di’ak liu no aumenta partisipasaun Estadu-membru sira iha determinasaun prioridade rejionál no globál.
Nia substitui Abigail Tiny Cosme iha lideransa instituisaun nian, iha tempu ne’ebé CPLP buka moderniza nia diplomasia linguístika no reforsa kooperasaun entre nasaun sira ne’ebé uza língua portugés.
Hanesan akademiku no linguista boot ida husi Timor-Leste, Prof. Dr. Benjamim Corte-Real iha esperiénsia barak iha área linguístika. Nia hetan grau doutoramentu iha linguístika husi Macquarie University, Austrália, no uluk serve ona nu’udar Reitór ba Universidade Nacional Timor Lorosa'e (UNTL) no Diretór ba Instituto Nacional de Linguística (INL).
Maski simu responsabilidade internasionál ida-ne’e, Benjamim Corte-Real kontinua hala’o nia knaar nu’udar profesór iha UNTL, ho objetivu atu liga dezenvolvimentu edukasaun nasionál ho formulasaun polítika linguístika iha nivel internasionál.
