Dili, Juñu 2026 (GMT News) – Durante tinan rua-nulu resin, Lionel Messi no Cristiano Ronaldo kontinua fahe adepitu futeból sira iha mundu tomak. Maibé estudu foun ida hosi Universidade Teknolójika Nanyang (NTU), Singapura, revela katak preferénsia ba estrela futeból rua ne’e la depende deit ba sira nia abilidade iha kampu, maibé mós bele influensiadu husi hanoin polítika ema nian.

Peskizador sira halo levantamentu ba ema liu 10.000 iha nasaun 26, inklui Alemaña, Arjentina, Portugál, Índia, Korea Sul, Méxiku, Japaun, Brazíl, Reino Unido no Estadus Unidus.

Rezultadu hatudu katak Messi hetan apoiu forte liu iha nia rai moris Arjentina, no mós iha Estadus Unidus, Reino Unido, Kanada, Korea Sul, Finlándia, España no Noruega.

Iha parte seluk, Cristiano Ronaldo nia adepitu sira konsentra liu iha África Norte, Sudeste Aziátiku no Médiu Oriente. Nasaun sira hanesan Portugál, Indonézia, Índia, Turkiya, Xina, Nijéria no Méxiku hatudu apoiu boot ba CR7.

Koria Sul sai nasaun ne'ebé hatudu preferénsia aas liu ba Messi, liu Arjentina rasik. Peskizadór sira hateten katak ida-ne’e bele liga ho desapontamentu(kekecewaan) adeptu sira bainhira Ronaldo la tama atu joga iha partida exibisaun ida iha Seoul iha tinan 2019.

Estudu ne’e mós deskobre katak utilizadór sira ne’ebé hetan informasaun liuhusi plataforma hanesan Instagram no TikTok tiha tendénsia prefere Ronaldo. Peskizadór sira konsidera katak ida-ne’e bele tanba CR7 iha prezensa forte tebes iha média sosiál.

Aleinde ne’e, ema sira ne’ebé apoia Ronaldo geralmente iha autokonfiansa/fiar an makaas liu. Tuir peskizadór sira, grupu ida-ne’e normalmenti atraidu ba personalidade dominante, ambisiozu no inspiradora.

“Ema balun bele hatudu an hanesan ema haraik-an, maibé ne’e la signifika katak sira prefere liu hili figura públika ne’ebé haraik-an. Ema ho fiar an makaas bele sente atraidu liu ba ema ne’ebé reprezenta exelénsia, konfiansa no susesu,” hateten Saifuddin Ahmed, Profesór Asosiadu iha NTU.

Rezultadu estudu ne’e mós hatudu diferensa polítika entre adeptu rua ne’e. Ema sira ne’ebé prefere Ronaldo tende iha orientasaun polítika konservadora liu, enkuantu adeptu Messi sira tende iha hanoin polítika liberal liu.

Tuir Saifuddin Ahmed, preferénsia ne’e bele explika tanba imajen públiku ne’ebé atleta rua ne’e projeta ba sosiedade.

“Messi normalmenti idéntiku ho imajen kalma, simples no orientadu ba ekipa. Ronaldo, iha parte seluk, koñesidu tanba nia ambisaun, fiar-an orgullu ba susesu individuál. Ema sira dala barak sente atraidu ba atleta ne’ebé nia imajen públiku aliña ho sira nia valor no prinsípiu moris,” nia dehan.

Estudu ne’e publika iha plataforma peskiza SSRN iha loron 20 Maiu no hatudu katak rivalidade entre Messi no Ronaldo agora la’ós deit kona-ba futeból, maibé mós reflete diferensa sira iha personalidade, valor no hanoin polítika iha sosiedade moderna.

GMT News