Díli, 25 Juñu 2026 (GMT News) – Vise-Primeiru-Ministru no Sekretáriu-Jerál Partidu CNRT, Francisco Kalbuady Lay, hato’o sentidu kondolénsia profunda ba família, kolega polítiku no povu Timor-Leste tomak tanba falesimentu eis Prezidente Repúblika, Francisco Guterres Lú-Olo, ne’ebé nia konsidera hanesan ema di’ak ida ne’ebé fó kontribuisaun boot ba luta libertasaun no dezenvolvimentu nasaun.

Kalbuady Lay dehan katak nia foin fila husi Portugal no to’o kedas husi aeroportu bainhira rona notísia kona-ba matebian Lú-Olo nian.

“Há’u foin to’o mai. Há’u rona dehan Maun Lu iis kotu ona. Há’u iha Portugal hela ho Maun Boot. Bainhira rona notísia ne’e, hau husu ba Maun Boot atu fila kedas mai. Agora hau foin to’o husi aeroportu,” hateten Kalbuady Lay.

Lori Governu no Partidu CNRT nia naran, nia hato’o solidariedade no apoiu tomak ba família, Comité Central FRETILIN no estrutura polítika sira ne’ebé durante ne’e servisu hamutuk ho Lú-Olo.

“Em nome do Governo no mos Partidu, nu’udar Sekretáriu-Jerál, hau hamutuk ho Maun Boot no estrutura tomak hato’o sentidu kondolénsia profunda ba família tomak. Ita Timor lakon ema di’ak ida hanesan Maun Lu-Olo,” nia dehan.

Tuir Kalbuady Lay, nia koñese Lú-Olo desde 1999 nia hamutuk ona ho Lú-Olo.

“Ha’u koñese nia desde nia tun husi ai-laran. Ami hamutuk hela durante tinan barak. Hau sente katak ita lakon ema di’ak ida. Maibé buat hotu Maromak mak deside,” nia hateten.

Nia mos husu ba povu Timor-Leste atu kontinua fó apoiu ba família matebian nian, liuliu ba nia oan sira ne’ebé sei kontinua eskola.

“Maun Lu la hamutuk ona ho ita fisikamente, maibé nia espiritu sei hamutuk hela ho ita hotu-hotu. Ita tenke kontinua fó forsa ba família no apoiu labarik sira atu kontinua sira nia estudu ho di’ak,” dehan Kalbuady Lay.

Iha oportunidade ne’e, Vise-Primeiru-Ministru ne’e rekorda kontribuisaun boot Lú-Olo nian ba konstrusaun Estadu Timor-Leste, husi luta libertasaun to’o períodu independénsia.

Nia lembra katak Lú-Olo servisu hamutuk ho lideransa rezisténsia sira no depois sai Prezidenti Assembleia Konstituinte, ne’ebé lidera prosesu elaborasaun Konstituisaun Timor-Leste nian.

“Ha’u hamutuk ho Maun Lu no kamarada sira seluk, inklui Sekretáriu-Jerál maun Mari Alkatiri, servisu iha Comité Central to’o harii Assembleia Konstituinte. Maun Lu sai Prezidenti Assembleia Konstituinte no depois sai Prezidenti Repúblika. Kuaze nia vida tomak fó kontribuisaun ba rai ida ne’e no ba povu ida ne’e,” nia hateten.

Kalbuady Lay mos fahe lembransa pesoál kona-ba amizade ne’ebé nia iha ho Lú-Olo durante tinan barak.

“Ha’u la haluha. Ami nain rua dala barak tuur hamutuk halo komíku. Ami rua toka hotu. Nia gosta toka viola. Nia ema ida ne’ebé la ko’alia barak, maibé hanesan ema besik ida. Hau sente katak hau mos lakon ema besik ida iha hau nia vida laran,” nia dehan ho emosaun.

Iha remata, Francisco Kalbuady Lay husu atu reza ba Nai Maromak atu simu Lú-Olo nia klamar no fó fatin di’ak ba nia.

“Husu ba Nai Maromak atu haraik fatin di’ak ba Maun Lu atu deskansa iha dame. Obrigadu ba Maun Lu no agradese ba maun Lu” nia konklui.