Díli, 23 Juñu 2026 (GMT News) – Antigu Prezidente Repúblika no líder rezisténsia, Taur Matan Ruak, hato’o mensajen emocionál ida durante entrevista husi media sira iha antigu Prezidente Repúblika, Dr. Francisco Guterres 'Lú-Olo' nia rezidensia iha Farol.
Taur Matan Ruak hateten katak nia ho Lú-Olo hamutuk ba Malázia atu buka tratamentu médiku. Maibé, antes nia fila mai Timor-Leste, sira hotu halo despedida ikus ba malu.
“Antes hau fila, ami hotu despede nia. Hau hateten katak ami hotu la haluha nia. Hamutuk ho nia nafatin. Saidá deit mak mai, ita simu hotu tanba nee iha Maromak nia liman,” dehan Taur Matan Ruak.
Nia mos relata katak hakuak ikus ne’ebé nia fó ba Lú-Olo iha Malázia sai tempu ikus ne’ebé sira hasoru malu antes falecimento ne’e.
Taur Matan Ruak hato’o agradesimentu ba kontribuisaun boot ne’ebé Lú-Olo fó durante luta ba independénsia no durante servisu ba nasaun. Nia hateten katak, maski Lú-Olo ba ona, nia legadu no valór sira sei hela nafatin iha povu Timoroan nia moris.
“Nia ba ona, ita fó obrigado tanba destinu mak hanesan ne’e duni. Ita ne’ebé moris tenke forsa nafatin. Ohin loron ida-ne’e ita konsentra atu husik nia iha nia fatin ikus, no Maromak bele fó fatin ba nia iha Reinu Rohan Laek”
Taur Matan Ruak mos husu povu tomak atu kontinua lori rai Timor-Leste ba oin, tanba responsabilidade ne’ebé Lú-Olo husik hela agora tula hela ba jerasaun foun sira.
Nia agradese solidariedade no manifestasaun laran-metin ne’ebé povu Timor-Leste, liuliu iha Díli no munisípiu sira seluk, hatudu ba família no ba nasaun durante períodu lutu ida-ne’e.
“Obrigadu barak ba populasaun tomak ne’ebé hatudu matabeen no solidariedade boot ba lakon ida-ne’e,” hateten nia.
Hanesan komandante rezisténsia no kompaneiru luta ida, Taur Matan Ruak konsidera falecimento Lú-Olo nian nu’udar lakon boot ba Timor-Leste. Nia husu Maromak atu fó konsolasaun ba família, kolega no povu tomak ne’ebé senti triste ho partida antigu Xefe Estadu ne’e.
