Díli, 1 Jullu 2026 (GMT News) – Governu Timor-Leste anunsia katak Primeiru-Ministru no Ministru Finansas Repúblika Singapura, Lawrence Wong, sei realiza vizita ofisiál ba Timor-Leste iha loron 2 to’o 3 Jullu 2026, vizita ne’ebé sei marka momentu istóriku iha relasaun diplomátika entre nasaun rua.
Vizita ida-ne’e sei sai vizita dahuluk husi Primeiru-Ministru Singapura ida ba Timor-Leste desde relasaun diplomátika entre nasaun rua hahú. Governu hateten katak vizita ne’e reflete amizade metin no kompromisu atu haforsa tan kooperasaun bilateral, aumenta ligasaun entre povu rua, no promove prioridade sira ne’ebé partilla hamutuk iha rejiaun.
Governu mos salienta katak Singapura durante tinan barak sai parseiru estratéjiku ida ba Timor-Leste, liuliu iha apoiu ba prosesu integrasaun Timor-Leste ba ASEAN no programa formasaun kapasidade ba funsionáriu públiku Timoroan. Apoiu ne’e konsidera hanesan kontribuisaun importante ba dezenvolvimentu institusionál no preparasaun Timor-Leste atu participa plenamente iha organizasaun rejionál.
Tuir Governu, vizita Primeiru-Ministru Lawrence Wong mai iha tempu ne’ebé importante, depoisde Timor-Leste hetan estatutu membru da-11 ASEAN. Enkontru ida-ne’e sei loke oportunidade atu aprofunda tan kooperasaun polítika, ekonomia no dezenvolvimentu entre Timor-Leste ho Singapura, inklui iha kontestu komunidade ASEAN.
Governu Timor-Leste mos manifesta nia haksolok atu simu Primeiru-Ministru Lawrence Wong no delegasaun Singapura iha Díli, ho esperansa katak vizita ofisiál ida-ne’e sei hamosu rezultadu konkreta atu haforsa amizade no kooperasaun prátika entre nasaun rua iha futuru.
