DILI, 22 Junu 2026 (GMT News) – Primeiru-Ministru (PM) Malásia, Dato' Seri Anwar bin Ibrahim haruka mensajen kondolénsia ba falesimentu husi Eis-Prezidente Repúblika Demokrátika Timor-Leste (RDTL), Francisco Guterres "Lú-Olo".
Eis-Prezidente Francisco Guterres "Lú-Olo" hakotu iis iha Hospital Prince Court, Kuala Lumpur, Malázia, iha loron Domingu (21/06) kalan, hafoin hetan tratamentu saúde intensivu.
Notísia triste kona-ba falesimentu Prezidente Jerál Partidu FRETILIN, no mós Eis-Prezidente Asembleia Konstituinte Repúblika Timor-Leste no Eis-Prezidente Parlamentu Nasionál ne'e, fó sai husi liu husi Pájina Ofisiál "Pájina Ofisiál Francisco Guterres Lú-Olo", ne'ebé públika iha loron Domingu (21/06) kalan.
PM Malásia, Dato' Seri Anwar bin Ibrahim, iha mensajen kondolénsia ne'ebé nia hakerek iha nia media sosiál "Anwar Ibrahim," hatudu ninia laran-triste klean kona-ba falesimentu eis-Prezidente Timor-Leste, Francisco Guterres.
"Hau mós laran-triste ba falesimentu husi eis-Prezidente Timor-Leste, Francisco Guterres. Ho Malázia nia naran, hau hato'o kondolénsia ba família no ba povu Timor-Leste," hakerek PM Malásia ne'e.
Xefe Governu Malásia ne'e hakerek mós kona-ba relembra Prezidente Guterres, ne'ebé mai husi jerasaun ne'ebé luta ba ukun-rasik-an Timor-Leste nian. Nia (Lú-Olo) gasta tinan-tinan barak iha movimentu rezisténsia, fatin ne'ebé nia hetan naran Lú-Olo, no depois serbí ba nasaun nu'udar Prezidente Parlamentu Nasionál no mós nu'udar Xefe Estadu Timor-Leste. Durante ninia karreira, nia leal ba liberdade povu nia no ba dezenvolvimentu nasaun demokrátiku.
"Malázia mós laran-triste ba ninia partida. Nia sei kontinua relembra iha ne'e (Malásia) ho respeitu no domin tomak," relembra PM Malázia ne'e.
Eis-Prezidente Francisco Guterres "Lú-Olo" nia falesimentu, husik hela feen Cidália Lopes Nobre Mouzinho Guterres, no oan-na'in-haat, Francisco Cidalino, Eldino Nobre, Felezito Samora Guterres no Dália Luliana Nobre Guterres.
Eis-Prezidente Lú-Olo, moris iha Ossu, Distritu Viqueque, iha loron 07 Setembru 1954, no hakotu iis ho idade tinan 71.
Tuir planu, lori-fila isin-mate husi mendiang Lú-Olo husi Kuala Lumpur sei to'o iha Timor-Leste iha loron Tersa-feira (23/06).
