Díli, 23 Juñu 2026 (GMT News) – Populasaun nadodon husi área oioin iha kapitál no munisípiu hakbesik ba Aeroportu Internasionál Prezidente Nicolau Lobato no balun mos hein iha dalan hodi hatudu sira nia respeitu no solidariedade ba saudozu antigu Prezidente Repúblika no líder rezisténsia, Dr. Francisco Guterres “Lú-Olo”.
Atmosfera emosionante tebes senti iha aeroportu no iha dalan sira ne'ebé kareta funeráriu liu bá. Sidadaun sira, veteranu, juventude barak marka prezensa desde dadeer atu simu lider ida ne'ebé durante tinan barak dedika nia moris ba luta libertasaun no konstrusaun nasaun.
Kadáver eis-Prezidente Repúblika ne’e translada husi Kuala Lumpur, Malázia, liuhusi aviaun Aero Dili ne’ebé aluga husi Governu Timor-Leste. Aviaun ne’e to’o iha Aeroportu Internasionál Prezidente Nicolau Lobato, Díli, iha oras dadeer maizumenus tuku 6:00, no hetan resepsaun ofisiál ho onra estadu no militár.
Hafoin to’o iha rai Díli, kadáver saudozu nian simu husi lideransa Estadu, família, veteranu no membru komunidade sira ne’ebé marka prezensa atu fó despedida ikus ba figura istórika ida ne’e.
Dr. Francisco Guterres “Lú-Olo” hakotu iis iha Ospitál Prince Court, Kuala Lumpur, Malázia, hafoin hetan tratamentu médiku intensivu durante kuaze fulan ida tanba sofre moras komplikadu.
Prezensa boot husi populasaun iha aeroportu no iha sorin dalan sira reflete sentimentu laran no gratidaun povu Timor-Leste nian ba líder ida ne’ebé kontribui boot ba independénsia no dezenvolvimentu nasaun.
