Lisboa, Portugal, Juñu 2026 (GMT News) – Primeiru-Ministru Timor-Leste, Kay Rala Xanana Gusmão, hala’o vizita kortezia ba Fundação Mário Soares e Maria Barroso iha Lisboa, hanesan parte hosi programa ofisiál nia vizita servisu ba Portugal.
Durante vizita ne’e, PM Xanana fó valór aas ba kontribuisaun Mário Soares nian ba prosesu demokratizasaun iha Portugal, liuliu nia papél importante iha mudansa polítika ne’ebé lori ba konsolidasaun demokrasia depois hosi Revolusaun 25 Abril.
Primeiru-Ministru subliña katak Mário Soares sai figura istórika importante ida iha luta ba liberdade, demokrasia no direitus umanus, no nia kontribuisaun kontinua sai inspirasaun ba nasaun sira ne’ebé hakarak hametin instituisaun demokrátika no governasaun di’ak.
“Experiénsia Portugal nian iha konstrusaun demokrasia fó lisaun importante ba nasaun sira ne’ebé luta atu hametin paz, estabilidade no dezenvolvimentu,” dehan PM Xanana durante vizita ne’e.
Segundo Primeiru-Ministru, vizita ba Fundasaun Mário Soares reprezenta oportunidade importante atu aprende hosi istória polítika Portugal nian, liuliu kona-ba prosesu tranzisaun demokrátika no konsolidasaun instituisaun Estadu ne’ebé forte no inkluzivu.
Durante enkontru ne’e, fundasaun entrega mos livru no publikasaun lubuk ida ba delegasaun Timor-Leste. Material sira ne’e sei integra iha Xanana Reading Room, hodi permite sidadaun Timoroan sira, liuliu estudante no peskizador sira, asesu ba literatura no dokumentu importante kona-ba demokrasia, istória, governasaun no lideransa polítika.
PM Xanana hateten katak kontribuisaun ne’e sei ajuda dezenvolve formasaun intelektuál no konsiénsia sívika ba jerasaun foun Timor-Leste nian.
“Inisiativa ida ne’e sei kontribui ba formasaun intelektuál no konsiénsia sosiál jerasaun foun Timor-Leste nian, liu-liu iha komprensaun kona-ba valor demokrátiku sira,” hateten Primeiru-Ministru.
Nia mos lembra katak Mário Soares no nia kaben, Maria Barroso, durante sira nia vida públika sempre defende liberdade, demokrasia, solidariedade no dignidade umana, ne’ebé transforma sira sai referénsia importante iha Portugal no komunidade internasionál.
PM Xanana manifesta satisfasaun tanba bele vizita fundasaun ne’ebé dedika an atu prezerva memória istórika Portugal nian no promove edukasaun sívika no demokrátika ba jerasaun sira tuir mai.
Vizita ne’e akompaña hosi Embaixadór Timor-Leste ba Portugal, Manuel de Araújo Serrano, no Xefe Gabinete Primeiru-Ministru, Elizabeth Exposto.
Vizita ba Fundasaun Mário Soares reafirma kompromisu Timor-Leste atu kontinua promove valor demokrasia, liberdade no edukasaun sívika hanesan baze fundamental ba dezenvolvimentu sustentável no fortalese Estadu Direitu Demokrátiku iha país.
