Lisboa, Portugál, Juñu 2026 (GMT News) – Primeiru-Ministru Timor-Leste, Kay Rala Xanana Gusmão, hala’o vizita kortezia ba Prezidente Repúblika Portugál, António José Seguro, iha Palásiu Nasionál Belém, Lisboa, segunda-feira (22/06), hodi hametin relasaun amizade no kooperasaun entre Timor-Leste no Portugál.
Durante enkontru ne’e, Primeiru-Ministru Xanana Gusmão transmite saudasaun no komprimentus hosi Prezidente Repúblika Timor-Leste, José Ramos-Horta, ba Prezidente António José Seguro. Hosi nia parte, Prezidente Portugál lembra partisipasaun José Ramos-Horta iha serimónia tomada de posse nian iha Marsu tinan ida-ne’e.
“Ohin ha’u mai Palásiu Belém hasoru-malu ho Prezidente Repúblika, António José Seguro, nu’udár vizita kortezia ida. Ami troka hanoin kona-ba asuntu importante sira iha nível bilateral no internasionál,” hateten Primeiru-Ministru Xanana Gusmão.
Líder rua ne’e troka hanoin kona-ba dezenvolvimentu polítika internasionál no oportunidade atu reforça kooperasaun entre nasaun rua. Primeiru-Ministru mós kongratula Portugál ba nia eleisaun nu’udár membru naun-permanente Konsellu Seguransa Organizasaun Nasoins Unidas (ONU), no manifesta esperansa katak Portugál bele kontinua promove páz, estabilidade no dezenvolvimentu sustentável iha arena globál.
Iha oportunidade ne’e, Primeiru-Ministru hato’o mós preokupasaun kona-ba dezafiu sira ne’ebé Organizasaun Nasoins Unidas enfrenta atualmente, liu-liu relasiona ho mekanizmu veto iha Konsellu Seguransa. Nia defende nesesidade atu halo reforma ba sistema ne’e atu bele responde di’ak liután ba realidade internasionál ne’ebé muda hela.
Kooperasaun bilateral iha área justisa, edukasaun no dezenvolvimentu mós sai tópiku importante iha reuniaun ne’e. Xanana Gusmão agradese ba apoiu kontinuu hosi Portugál ba Timor-Leste, espesialmente iha setor justisa no edukasaun, ne’ebé durante tinan barak kontribui ba fortalese kapasidade institusionál Timor-Leste.
Líder rua ne’e mós diskute situasaun polítika iha Guiné-Bissau, no troka hanoin kona-ba forma sira atu promove estabilidade no fortalese instituisaun estatais iha nasaun ne’e.
Durante enkontru, Primeiru-Ministru apresenta mós estratéjia Ekonomia Azúl Timor-Leste nian no oportunidade sira ba kooperasaun futura entre Timor-Leste no Portugál iha área marítima no dezenvolvimentu sustentável.
Hosi parte Portugál, Prezidente António José Seguro reafirma kompromisu atu kontinua apoiu Timor-Leste iha área prioritária sira. Nia mós lembra nia envolvimentu iha kampaña solidariedade internasionál ba luta independénsia Timor-Leste durante década 1990, bainhira mobiliza juventude portugés sira atu apoia kauza Timor-Leste no participa iha inisiativa solidariedade oioin iha Europa.
Iha remata enkontru, líder rua reafirma vontade atu kontinua hametin relasaun istórika no amizade entre Timor-Leste no Portugál, hodi promove benefísiu mútuu ba povu nasaun rua.
Primeiru-Ministru Xanana Gusmão akompaña hosi Vise-Primeiru-Ministru Francisco Kalbuadi Lay, Ministru Justisa Sérgio da Costa Hornai, Ministra Edukasaun Dulce de Jesus Soares, Embaixadór Timor-Leste iha Portugál Manuel de Araújo Serrano, Embaixadora Timor-Leste ba CPLP Natália Carrascalão, no Xefe Gabinete Primeiru-Ministru Elizabeth Exposto.
