Díli, 25 Juñu 2026 (GMT News) – Primeiru-Ministru Timor-Leste, Kay Rala Xanana Gusmão, hamutuk ho ekipa tomak husi Gabinete Primeiru-Ministru, manifesta sentidu laran moras kle'an no kondolénsia profunda ba falesimentu eis Prezidenti Repúblika, Francisco Guterres Lú-Olo.
Iha mensajen ofisiál ida, Gabinete Primeiru-Ministru salienta katak Lú-Olo hanesan figura istóriku importante ida ne’ebé fó kontribuisaun boot ba luta libertasaun nasional no ba prosesu konsolidasaun instituisaun demokrátika Timor-Leste nian depois restaura independénsia.
Mensajen ne’e destaka katak durante nia vida polítika no patriótika, Lú-Olo dedika an ba servisu povu no nasaun, hahu husi tempu rezisténsia to’o okupasaun kargu importante sira iha Estadu. Nia papel iha luta ba independénsia no iha dezenvolvimentu instituisaun demokrátika konsideradu hanesan parte importante husi história moderna Timor-Leste.
Gabinete Primeiru-Ministru mos hato’o solidariedade no apoio moral ba família matebian nian durante momentu lutu ida-ne’e, no manifesta respeitu aas ba legadu ne’ebé Lú-Olo husik ba povu Timoroan.
Iha mensajen refere, Governu rekoñese katak kontribuisaun Lú-Olo nian la limita deit ba períodu luta libertasaun, maibé estende ba konstrusaun no fortalese instituisaun sira Estadu nian, inklui nia servisu nu’udar Prezidente Assembleia Konstituinte, Prezidente Parlamentu Nasional no Prezidente Repúblika.
Gabinete Primeiru-Ministru konsidera falesimentu Lú-Olo hanesan perda boot ida ba Timor-Leste, tanba nia sai parte importante husi jerasaun lider sira ne’ebé lori povu Timoroan ba ukun-an no independénsia.
Mensajen ne’e remata ho homenajen ba servisu no dedikasaun ne’ebé Francisco Guterres Lú-Olo fó durante nia moris tomak ba povu no nasaun, no reafirma katak nia kontribuisaun sei nafatin hela iha memória kolektiva povu Timor-Leste no iha istória nasaun nian.
