Nova Deli, 29 Juñu 2026 (GMT News) – Deputadu Parlamentu India no autor polítiku Shashi Tharoor hato'o kritika maka'as kona-ba pratika mudansa partidu polítiku (political defection) ne'ebé aumenta iha India. Iha artigu ida ho títulu "Ideology, Defection, and the Death of Purpose in Politics", ne'ebé publika iha jornal The Hindu, Tharoor dehan katak tendénsia ne'e la'ós de'it estratéjia polítika, maibé hatudu katak ideolojia no objetivu boot polítika daudaun hahú lakon.
Artigu ne'e mosu depois rezultadu eleisaun Assembleia Estadu West Bengal, ne'ebé All India Trinamool Congress (TMC) hasoru problema internu. Deputadu no membru partidu balu husik TMC atu tama ba National Democratic Alliance (NDA), koligasaun governu ne'ebé lidera husi Bharatiya Janata Party (BJP). Fenómenu hanesan ne'e mosu ona iha estadu sira seluk durante tinan hirak ikus.
Tuir Tharoor, polítika iha demokrasia ida tenke bazeia ba ideolojia, prinsípiu no vizaun atu dezenvolve nasaun. Partidu polítiku la'ós de'it organizasaun atu manán eleisaun, maibé fatin ida ne'ebé ema sira hametin valor, polítika públika no objetivu komun atu serve povu.
Nia esplika katak iha sistema demokrasia saudável, sidadaun sira fó sira-nia votu ba plataforma no programa polítiku ida. Tanba ne'e, bainhira reprezentante eleitu muda partidu depois eleisaun laiha diferensa ideolojika ne'ebé klaru, ida ne'e hanesan desrespeitu ba konfiansa eleitór sira nian.
"Bainhira polítiku ida muda partidu, nia la muda de'it ninia filiasaun polítika, maibé bele muda sentidu votu ne'ebé povu fó ba nia," hakerek Tharoor.
Artigu ne'e mos kritika kultura polítika ne'ebé konsidera podér no kargu hanesan objetivu prinsipál. Tuir nia, maioria mudansa partidu iha tempu ohin la'ós tanba mudansa konviksaun polítika, maibé tanba kalkulasaun atu hetan benefísiu pesoál, pozisaun governu ka seguransa polítika.
Tharoor dehan katak lei anti-defection ne'ebé India aprova atu prevene deputadu sira muda partidu seidauk sufisiente tanba polítiku sira buka dalan seluk atu evita regra legál sira. Rezultadu maka parlamentu bele sai fatin negosiasaun polítika, la'ós fatin debate ba polítika públika no interese povu.
Nia mos alerta katak bainhira partidu polítiku lakon identidade ideolojika, eleisaun sei sai de'it kompetisaun ba podér. Debate kona-ba saúde, edukasaun, ekonomia, seguransa no dezenvolvimentu sei menus importante kompara ho negosiasaun ba pozisaun no aliansa polítika.
Iha parte ikus artigu ne'e, Shashi Tharoor bolu atu hametin fila fali kultura polítika ne'ebé respeita ideolojia, integridade no responsabilidade ba eleitór sira. Nia sujere atu sosiedade no eleitór sira fó sansaun polítika ba reprezentante ne'ebé muda partidu laiha razaun ideolójika ne'ebé forte, tanba prátika ne'e bele enfrakese demokrasia no halakon konfiansa públiku ba instituisaun polítika.
Tharoor konklui katak futuru demokrasia depende ba kapasidade polítiku sira atu halo servisu públiku ho prinsípiu no vizaun, la'ós de'it atu buka poder. Tuir nia, bainhira ideolojia no interese povu fila fali ba sentru polítika, demokrasia sei bele nafatin forte no responde ba nesesidade sidadaun sira.