Díli, 25 Juñu 2026 (GMT News) – Ministru Negósius Estranjeirus Singapura, Vivian Balakrishnan, hato’o nia sentidu tristeza profunda ba falesimentu eis Prezidente Repúblika Timor-Leste, Francisco Guterres Lú-Olo.
Iha mensajen ida ne’ebé publika iha nia pajina Facebook ofisiál, Vivian Balakrishnan hateten katak nia triste tebes bainhira simu notísia kona-ba matebian Lú-Olo, ne’ebé durante ne’e koñesidu nu’udar estadista respeitadu ida no figura importante iha luta povu Timor-Leste nian ba independénsia.
“Presidenti Francisco Guterres mak estadista respeitadu ida no figura xave ida iha Timor-Leste nia luta ba independénsia,” hakerek Vivian Balakrishnan.
Nia mos subliña katak dedikasaun durante vida tomak ne’ebé Lú-Olo fó ba nia rai no nia kontribuisaun ba fortalese demokrasia no unidade nasional sei nafatin hela iha povu Timor-Leste no komunidade internasionál nia memória.
“Dedikasaun durante vida tomak ba nia nasaun no nia kontribuisaun ba fortalese demokrasia no unidade nasional Timor-Leste sei lembra ba nafatin,” nia hateten.
Ministru Negósius Estranjeirus Singapura ne’e mos hato’o nia kondolénsia profunda ba família matebian nian no povu Timor-Leste tomak durante períodu lutu ida-ne’e.
“Hau hato’o hau nia sentidu kondolénsia ba família no povu Timor-Leste,” hakerek Vivian Balakrishnan.
Mensajen solidariedade hosi Governu Singapura ne’e aumenta lista lider mundiál no autoridade internasionál sira ne’ebé hato’o ona omenajen no rekoñesimentu ba legadu polítiku no istóriku Lú-Olo nian.
Lú-Olo, ne’ebé lidera Timor-Leste nu’udar Prezidenti Repúblika entre 2017 no 2022, konsideradu nu’udar lider ida husi lider sira importante iha luta libertasaun nasional no iha prosesu konsolidasaun demokrasia depoizde independénsia.
Mensajen hosi Singapura reflete rekonesimentu komunidade internasionál ba papel importante ne’ebé Francisco Guterres Lú-Olo dezempeña iha istória Timor-Leste no ba nia kompromisu permanente atu servi povu no nasaun.
