Lisboa, Portugal, Juñu 2026 (GMT News) – Ministra Edukasaun Timor-Leste, Dulce de Jesus Soares, hato’o nia agradesimentu ba Governu Portugal tanba apoiu ne’ebé fó liu-husi implementasaun Projetu CAFE (Centros de Aprendizagem e Formação Escolar) iha Timor-Leste, durante enkontru bilateral ho Ministru Edukasaun, Siénsia no Inovasaun Portugal, Fernando Alexandre, iha Lisboa.
Enkontru ne’e realiza iha kuadru vizita traballu Primeiru-Ministru Timor-Leste, Kay Rala Xanana Gusmão, ba Portugal, ho objetivu atu fortalese relasaun no kooperasaun bilateral entre nasaun rua, liu-liu iha área edukasaun no dezenvolvimentu rekursu umanu.
Durante reuniaun ne’e, Ministra Dulce destaka katak Projetu CAFE atualmente implementa ona iha munisípiu 14 iha Timor-Leste no fó kontribuisaun importante ba dezenvolvimentu sistema edukasaun nasional, liu-husi apoiu ba prosesu aprendizajen no formasaun eskolár.
Nia subliña katak programa ne’e ajuda hametin kapasidade eskola sira no aumenta asesu ba aprendizajen iha komunidade sira iha rai-laran, kontribui ba objetivu Governu atu hasa’e kualidade edukasaun iha país.
Iha oportunidade ne’e, delegasaun Timor-Leste mos aprezenta proposta atu simu profesór portugés hamutuk 150 ba tinan letivu 2027, hodi reforça ensinu lian portugés no disciplina akademika sira seluk iha estabelecimentu ensinu iha território nasional.
Asuntu importante seluk ne’ebé aborda durante enkontru mak klarifikasaun kona-ba Diploma Ministeriál CAFE nian, ne’ebé regula funsionamentu sentru aprendizajen no formasaun sira iha kontestu sistema edukasaun nasional Timor-Leste.
Parte rua mos troka hanoin kona-ba planu formasaun kontinuada ba dosente Timoroan sira, ho apoiu tékniku no pedagójiku hosi Portugal, atu hasa’e kualidade ensinu no aprendizajen iha nivel nasional.
Ministra Dulce reafirma kompromisu Governu Timor-Leste atu promove no valoriza lian portugés nu’udar lian ofisiál Estadu, liuhusi implementasaun Lei Baze Edukasaun foun ne’ebé foin aprova.
Segundo nia, fortalecimentu ensinu lian portugés importante tebes atu garante implementasaun efetiva polítika edukativa nasional no aumenta oportunidade akademika no profisionál ba estudante Timoroan sira.
Durante reuniaun ne’e, delegasaun rua mos destaca importánsia kooperasaun edukativa iha kuadru Comunidade dos Países de Língua Portuguesa (CPLP), inklui selebrasaun Loron Mundiál Lian Portugés no rezultadu hosi Reuniaun Ministrus Edukasaun CPLP ne’ebé foin realiza iha Díli.
Enkontru ne’e reafirma relasaun metin no kooperasaun estratéjika entre Timor-Leste no Portugal iha área edukasaun, ho objetivu atu kontinua hametin kualidade ensinu, dezenvolve rekursu umanu no promove utilizasaun lian portugés iha sistema edukasaun nasional.
Governu rua konsidera edukasaun hanesan pilar fundamental ba dezenvolvimentu sustentável, no kompromete atu kontinua servisu hamutuk hodi garante futuru ida ne’ebé di’ak liu ba jerasaun foun Timoroan sira.
