Díli, 24 Juñu 2026 (GMT News) – Sekretáriu-Jerál Partidu FRETILIN no eis Primeiru-Ministru, Marí Alkatiri, hato’o nia agradesimentu ba Governu no Estadu Timor-Leste tanba deside fatin haloot maktoban ba antigu Prezidenti Repúblika, Francisco Guterres 'Lú Olo', entre maktoban Proklamadór Francisco Xavier do Amaral no Ma'Huno Bulerek Karathayano iha Jardín Eroi Metinaru.
Segundo Alkatiri, desizaun ne’e reflete rekonesimentu Estadu nian ba kontribuisaun boot ne’ebé Lú Olo fó ba luta libertasaun nasional no konstrusaun Estadu Timor-Leste.
“Governu deside ida-ne’e tanba ami mak hahú prosesu. Ba ida-ne’e obrigadu. Ami dehan klaru katak nia iha direitu atu hetan tanba nia ema ida mai husi povu ki’ik tebes duni,” dehan Alkatiri ba jornalista sira iha Farol, Díli.
Nia lembra katak Lú Olo hahú nia envolvimentu iha luta independénsia desde 1975 nu’udar militante FRETILIN, no durante períodu rezisténsia nia assume knaar importante hanesan asistente polítiku no Sekretáriu Komisaun Diretiva FRETILIN iha Frente Armada.
Depois independénsia, Lú Olo kontinua servisu ba nasaun liuhusi papel importante iha konstrusaun Estadu, inklui nu’udar Prezidente Asembleia Konstituinte ne’ebé lidera prosesu elaborasaun Konstituisaun Repúblika Demokrátika Timor-Leste.
“Hotu sai tiha hanesan eis-titulár, maibé kontinua sai fali Prezidenti Repúblika. Ida-ne’e hatudu momoos katak nia mai husi povu duni no sai Estadu nia ema tanba kria Estadu. Ami serbisu hamutuk duni ba ida-ne’e, maibé nia mak lidera prosesu ida-ne’e,” hateten Alkatiri.
Estadu determina katak maktoban Lú Olo sei lokaliza entre maktoban Proklamadór Francisco Xavier do Amaral no Ma'Huno Bulerek Karathayano iha Jardín Eroi Metinaru, fatin ne’ebé dedika ba herói no figuras históricas importantes Timor-Leste nian.
Serimónia fúnebre estadu ba Lú Olo sei realiza iha loron 26 Juñu 2026 ho programa ofisiál ne’ebé prepara ona husi Governu no família.
Tuir programa ne’e, iha sexta-feira dadeer, korpu matebian sei lori husi rezidénsia família ba Sede Komité Sentrál FRETILIN, antes kontinua ba Kuartél Jenerál F-FDTL iha Fatuhada atu hetan omenajen hosi instituisaun defesa nasional.
Depois hosi vizita ba instituisaun relevante sira, matebian sei lori ba Sé Catedral de Díli hodi realiza misa requiem no serimónia despedida ikus. Hafoin misa, korpu matebian sei lori ba Jardín Eroi Metinaru atu hakotu serimónia fúnebre estadu ho enteramentu ofisiál.
Lú Olo, ne’ebé serviu nu’udar Prezidenti Repúblika entre 2017 no 2022, konsidera hanesan ida husi figuras principais iha luta libertasaun nasional no prosesu konsolidasaun Estadu Timor-Leste, ho legadu ne’ebé kontinua marka istória no dezenvolvimentu nasaun nian.
