Dili, 22 Juñu 2026 (GMT News) – Família no Governu deside ona atu haloot saudozu eis-Prezidente Repúblika, Francisco Guterres "Lú Olo", iha loron Sesta-feira, 26 Juñu 2026, iha Jardín Eroi Pátria, Metinaru, Dili.
Sekretáriu Estadu Asuntu Veteranu, César dos Santos da Silva “Merak”, hateten katak kadavér saudozu nian sei to’o iha Aeroportu Internasionál Prezidente Nicolau Lobato, Dili, iha tuku 6:00 dadeer no sei simu ho onra militár antes lori ba serimónia fúnebre estadu.
“Tuir planu ne’ebé prepara ona, kadavér saudozu sei simu ho onra parada militár iha aeroportu no hafoin ne’e sei lori ba serimónia fúnebre iha Jardín Eroi Pátria, Metinaru,” hateten Merak ba jornalista sira iha Dili.
Tuir nia hateten, desizaun atu haloot iha Jardín Eroi Pátria sei formaliza liuhusi dekretu prezidensiál.
Komisaun organizadora mós apela ba populasaun no funsionáriu Estadu tomak atu partisipa hodi simu kadavér saudozu nian bainhira to’o iha nasaun.
Saudozu Francisco Guterres “Lú-Olo”, hanesan lider rezisténsia no Prezidente Partidu FRETILIN durante tempu naruk, hakotu iis iha Domingu, 21 Juñu 2026, iha Ospitál Prince Court, Kuala Lumpur, Malázia, hafoin hetan tratamentu médiku intensivu.
Observasaun iha rezidénsia saudozu nian iha Farol, Dili, hatudu katak membru Governu, veteranu, juventude rezisténsia no komunidade kontinua marka prezensa hodi presta omenajen ikus ba lider istóriku ne’e.
Preparasaun atu simu kadavér saudozu nian kontinua la'o, enkuantu forsa seguransa husi Polísia Nasionál Timor-Leste no F-FDTL reforsa seguransa iha área Farol. Carro funeráriu militar mós prontu ona iha rezidénsia saudozu nian atu apoiu movimentasaun ofisiál sira durante períodu lutu nasionál.
