Díli, 21 Juñu 2026 (GMT News) – Timor-Leste sente lakon ida husi nia lider istóriku Francisco Guterres Lú Olo iha Ospitál Prince Court, Kuala Lumpur, Malázia, iha ne'ebé nia hala’o hela tratamentu saúde intensivu.
Notísia triste ne’e konfirma hosi Família Nobre Guterres iha pájina facebook Pájina Ofisiál Francisco Guterres Lú Olo , ne’ebé hato’o katak eis-Prezidente Repúblika, Prezidente FRETILIN, eis-Prezidente Asembleia Konstituinte no eis-Prezidente Parlamentu Nasionál ne’e hakotu iis ona iha loron Domingu, 21 Juñu 2026.
Tuir família, partida Lú Olo reprezenta lakon boot ida ba família, FRETILIN, maluk sira iha luta libertasaun nasional no povu timoroan tomak ne’ebé partilha mehi atu harii Timor-Leste ida livre, demokrátiku no soberanu.
Família husu ba públiku atu respeita privasidade família nian iha momentu lutu ida ne’e no agradece ba mensajen solidariedade no apoiu ne’ebé simu ona hosi ema barak.
Hakotu iis husi Dr. Francisco Guterres Lú Olo ida ne'e marka lakon ida boot ba Timor-Leste, tanba nia papél importante iha luta ukun-rasik no iha prosesu konsolidasaun demokrasia no instituisaun estadu nian.
